Thursday 23 April 2009

القشطلية

قشطلية أهل الخليج والشام واليمن

القشطلية بتاعتــي



علشان خاطر عيون أجمل موني صاحبة أجمل مطبخ فيكي يا مدونات جمهورية مصر العربية هقدم طريقة عمل القشطلية

بس فيه حاجه مهمة يا موني إني لما عملت الصنف ده كان اختراع من بنات أفكاري ولهذا قصة
كان ليا جارة سورية قالتلي إنهم بيعملوا الصنف ده وشرحتهولي بس كانت بتضيف ليه مياه مش حليب
أنا بقى أضفت حليب وطلع رائع ولما قلت لإحدى صديقاتي المتزوجة من رجل يمني قالتلي دي القشطلية

لذلك هكتب ليكي طريقتي ببساطة وبعدين أكتبلك المقادير والطريقة بدقة شديدة تبع أهل صنع القشطلية

قشطلية المصــرية
ـــــــــــــــــــــــــــــــ

لا تختلف عن طريقة عمل حلاوة الدقيق إلا في حاجتين بس

سميد البسبوسة بدل الدقيق

الحليب المذاب فيه السكر بدلا من الماء المذاب فيه السكر

وعلى فكرة أنا بعمل أكلاتي بالبركة

يعني تحطي سميد في سمن أو زيت على النار لغاية لما لونه يتغير شوية صغيرين1-

تكوني مجهزة الحليب المذاب فيه السكر2-

تصبيه على السميد مع الخفق المستمر ولو حسيتي إنه هيكلكع اضربيه في الخلاط3-

بعد كده وحسب الرغبة تضيفي جوز هند للخليط4-

وممكن لو حبيتي تزوقي الوش بالمكسرات وجوز الهند5-

ملحوظة:
ــــــــــــــــ

الصنف بتاعي ده مش بيبقى جامد زي القشطلية المتعارف عليها أنا بعمله بيبقى قريب من المهلبية

كده كتبت ليكي طريقتي

تعالي بقى للطريقة اللي بالمقادير علشان أنا عارفة إنك بتحبي المقادير الدقيقة


***********************************************************

المقادير
ـــــــــــــــــــــــ
ثلاث أكواب حليب بودرة
كوب ونصف سميد
كوب سكر

بيضتين

ملعقة طعام ماء زهر

ثمانيه ونصف إلى 9 أكواب ماء

علبتين قشطة

كيس دريم ويب


الطريقة
ـــــــــــــــــ

سنضع السميد والحليب والبيض والسكر في قدر


ثم سنضيف إليه الماء ونخفقه جيداً بواسطة خفاقة اليد أو مغرفة عادية إلى أن يمتزج الخليط مع بعضه جيداً


ثم سنضع القدر على النار مع التحريك المستمر إلى أن يغلي فنحركه دقيقتين ثم نرفعه عن النار


ونضيف إليه ماء الزهر ونحركه جيداً ثم نسكبه في طبق


والآن نتركه جانباً


سنضع القشطة والدريم ويب في طبق ونخفقهم معاً جيداًثم نسكبها فوق الطبق ونفردها بالتساوي


والآن فوق الطبق سنرش قليل من جوز الهند ثم نرش قليل من الفستق الحلبي


ثم يوضع في الثلاجة على الأقل 12 ساعة ثم يقطع ويقدم


ملاحظة
ـــــــــــــــــ
انتظري إلى أن يبرد الطبق خارج الثلاجة قبل وضعه فيها


ويمكنك تركه إلى أن يبرد ثم ضعي عليه الكريمة المخفوقة مع القشطة وبعدها ضعيه مباشرة في الثلاجة


لو عجبك الصنف ده ونفذتيه يا موني قوليلي النتيجة وصحتين وهنا على قلبك مقدما

24 comments:

  1. جوعتينا يا مصرية

    تسلم ايدك

    انا عايزة من دا

    بس فى مكونات مش عندى للاسف

    :(

    بس هتتحفظ عندى لغاية لما انزل دى لازم تتعمل

    شكرا ليك

    تقبلى مرورى

    ReplyDelete
  2. تيجي بالسلامة يا نونو

    بس لعلمك طريقتي أجمل من الطريقة المتعارف عليها

    أنصحك تعمليها هتبقى مفيدة جدا لسومة وفي نفس الوقت لذيذة جدا وعن تجربة

    دمتي سالمة

    ReplyDelete
  3. يا بختك يا موني
    تسلمي حبيبتي على الطريقة شكلها يجنن و سهلة
    وتقديمك رائع

    شكرا حبيتي على كلامك الطيب و نا غيرت اسمي مخصوص

    ReplyDelete
  4. تسلم ايدك يالغلاا

    انا بحب الحلويات دي

    الي فيها حليب وقشطة وكدا

    وان شاء الله هبقى اجربها

    امووووووووووووووواه

    ReplyDelete
  5. تلم ايدك يا جميل


    انا طبعا هعمل طريقتك

    بس انا عايزة بأه مقادير مظبوطة لطريقتك بالضبط
    بالكوبايات او الملاعق

    علشان اعرف اظبطها و بعد كده ابقي أوصل للإحتراف و اعمل بالبركة زيك يا جميل

    ReplyDelete
  6. النكهة المغربية الجميلة

    يعايشك حبيبتي أنا حبيتك برشه برشه

    الكلام ده تونسي بس أهو قريب من المغربي بقى

    إبقي ادينا دروس في اللهجه المغربي

    جربي الوصفه بتاعتي وقوليلي رأيك والله هتعجبك جدا

    ودوقيها للي حواليكي وقوليلهم ده اختراع المصرية

    واهو كله علشان مصر وتشجيع السياحه

    ( وش بيضحك )

    نورتيني وفي انتظارك دائما

    ReplyDelete
  7. نوارة حبيبتي

    حبي الحلويات براحتك وكلي بألف هنا وشفا بس إياكي واللظلظه اللي هي البألظه اللي هي الربربة

    حافظي على وزنك يا ملكة الرشاقة والأناقة والشياكة

    مواهين مش مواه واحده

    ReplyDelete
  8. حبيبتي موني

    عايزة مقادير مني أنا ؟

    عاااااااااااااااا وكمان عاااااااااااا

    أنا مش بعمل أي حاجه بمقادير إلا بس الحاجات اللي بتكتبيها

    لكن أنا كل شغلي بالبركه وبيطلع جميل

    بجد هزعل والله أنا عايزاكي تعملي بتاعتي مش التانية

    أرجوكي حاولي تحترفي علشان خاطري

    جربي دي كأنك بتعملي حلاوة الدقيق ومن السماكه بتاعة الخليط هتقدري تميزي مقاديرك صح ولا عايزة تظبيط

    عرفيني النتيجه

    موااااااااااااااه

    ReplyDelete
  9. و الله انا حبيتكم كمان و بشكر الفرصة السعيدة لي خلتني أتعرف بيكم -كان حضي جامد لما دخلت لمدونة موني بالصدفة و عرفتكم-
    اضاهر أن كلكم مصريين مش كده؟؟؟؟؟؟؟؟؟؟؟؟؟

    ReplyDelete
  10. السلام عليكم ورحمة الله وبركاته

    جميل اوي تسلم اديك يا مصريه

    ماعملتش القشطليه دي قبل كده بس اوعدك اني اجربها قريب
    انتي عارفه انا زيك كده لا مقادير ولا دياولوا ربنا يخليلنا
    the baraka method
    هههههههههههه

    بس ليا ملاحظتين علي الطريقه التانيه

    اولا هي تعتبر كده مش بتتعمل بميه دي بلين بس بودره ( 3 كوب لبن بودره + 9 كوبيات ميه
    )هما تقريبا بيعملوا كده عشان الحليب الطازه بتاعنا مش متوفر اوي عندهم وتلاحظيها في كل الوصفات بتاع الخليجيات ( مثلا لما بيعملوا عجيبنه يقولك حطي معلقتين لبن بودره وتلاقيهم بيعجنوها بميه احنا بقي نعجنها بلبن علي طول )
    فاعتقد برضو انه في الطريقه التانيه ممكن نستبدل اللبن البودره والميه بلبن حليب عادي 9 كوبيات وخلاص مش كده
    كمان علبتين القشطه ممكن جدا نستبدلهم بقشطه لباني عاديه او حتي مقشوطه من علي وش اللبن

    تاني حاجه طريقة انك تحطي البيض في اللبن وترفعيهم علي النار دي شبيهه بطريقة الكاستر وبالتالي اتوقع ان القشطليه مش هاتبقي جامده اوي يعني هاتبقي شبه الكاستر كده او المهلبيه صح ولا انا بيتهيألي


    بصي انا هاجربها ان شاء الله وواشوف هايطلعلي ايه


    سلام يا قمر

    ReplyDelete
  11. the baraka method?

    جميل قوي المصطلح ده

    أهلا بالخمسة فضفضة

    ملاحظاتك مظبوطة جدا جدا بس فيه حاجه إن الطريقة التانية دي بتخللي القشطلية تتقطع بالسكينة لأنك بتحطيها في التلاجه فترة طويلة لكن طريقتي بتخليها زي الكستر والمهلبية

    وزي ماقلتلكم اتعاملوا معاها على إنها زي حلاوة الدقيق

    إبقي عرفيني النتيجة يا فضفضة

    نورتيني وابقي تعالي زورينا في مطبخي والمطابخ الشكيكة

    دمتي سالمة بحفظ الرحمن

    ReplyDelete
  12. النكهة المغربية الجميلة

    أنا اللي أعرفهم أغلبهم مصريين وفيه فلسطينية وأعرف واحده مغربية إسمها نكهة مغربية ههههه

    إنتي ولا يهمك بس تعالي وسطينا وهتستفيدي

    مافيش فرق بين المصريين وغيرهم من أشقائهم العرب

    دمتي سالمة بحفظ الرحمن

    ReplyDelete
  13. ربينا يخليكي ده عشمي بردك
    شكراااا حبوبتي و ربنا يسلمك

    ReplyDelete
  14. ان شاء الله هاعمل بالبركه زيك
    وان شاء الله هتطلع حلوه لان اللى انتى عملها ماشاء الله شكلها يفتح النفس
    ربنا يبارك فيكى

    ReplyDelete
  15. تسلم ايدك
    هي فعلا حلا خليجي بيتاخد مع القهوة السعودي
    والبركة احلى شيء يا معلم طبعا
    اخبار نفسوياتك ايه؟
    طمنيني عليكي

    ReplyDelete
  16. ما شاء الله ..

    انا الصراحة جوعت اوى :D

    ان شاء الله هابقى احاول اعملها ..

    جزاكِ الله خير حبيبتى مصرية ..

    دمتِ بخير ..

    ReplyDelete
  17. ست الحبايب الفراغ

    على فكرة اختاري ليكي اسم غير الفراغ

    إنتي عاملة مدنة كلها مواضيع في المليان وجميلة زيك

    منتظره نتيجة عمايلك للقشطلية

    وراعي إنك وانتي بتعمليها توصلي لقوام المهلبية يعني تتوصي بالحليب وتسيبيها تستوي وتاخد راحتها شويتين على النار

    دمتي سالمة بحفظ الرحمن

    ReplyDelete
  18. أهلا ستاتيتو

    أنا ما أكلتهاش عند الخلايجة لكن اخترعتها بعد ماجارتي قالتلي عليها بس كانوا بيحطوا مياه بسكر بدل الحليب بسكر وانا اخترعت موضوع الحليب وسبحان الله عجبتهم جدااا لما عملتلهم منها

    الأصلية بتاعة الخليج ماعجبتنيش علشان جامدة أنا بعملها زي المهلبية

    حاولي تنفذيها للولاد وقوليلي نتيجة التجربة

    دمتي سالمة

    ReplyDelete
  19. لوجي حبيبتي

    حاولي ولا يهمك حتى لو ماطلعتش مظبوطة هتقدري تعرفي ايه العيوب وتتفاديها

    ابقي قوليلي النتيجة بس من غير ضرب أنا قصدي أدوقكم حاجه حلوة ( وش بيضحك )

    دمتي سالمة

    ReplyDelete
  20. اول مره ازور مدونتك وقفتشك عن البت موني الى مش بتقولي يا اختي على المدونات الحلوه هاقطعها

    واتفاجأت لما لقيتك حاطه مدونتي عندك يظهر ان انا فاشله مدونات بصراحه


    اولا تسلم اديكى يا جميل

    دى كده تبقى عامله زي ما تكون بسبوسه بس مسوينها على النار فوق

    بصي انا هاجرب فى حاجه بسيطه كده وبعدين اقولك جرى ايه

    مش كنت اشوفها بدري

    انا لسه عامله بسبوسه اهو

    يلا مش مهم المره الجايه

    بس انا هاعمل طريقتك ان شاء الله شكلها احلى كده

    تحياتي ليكى

    ReplyDelete
  21. صبرني هانم الجميلة اهلا وسهلا

    بصي بقى لو هتعمليها بالطريقة الأصلية مش بتبقى زي البسبوسة لا لا بتبقى زي المهلبية الجامدة تقطعيها بالسكينة وبيبقى لونها فاتح خالص

    ماعجبتنيش

    لكن اللي أنا كنت مخترعاها قبل ماعرف حكاية القشطلية دي عجبتني لأنها زي المهلبية بس بمزاق جديد علينا

    المهم تظبطي كمية الحليب وتقلبيها على النار لغاية قوامها يبقى زي المهلبية

    نورتيني بمرورك ودمتي سالمة بحفظ الرحمن

    ReplyDelete
  22. يا ست هانم, بجد انا ما بمزحش انتي لازم تنضمي النا في نادي الوليمه.
    أولا هو اول منظمه عربيه يجتمع فيها العرب من غير خناقات .
    تانيا كلنا بننتج فيها احلى ألأكلات اللي بنقدمها لأهلنا و لأحبابنا, يعني عمل خير ملىء بالحب و العطاء و ناخد عليه اجر ان شاء الله.
    ثالثا, انتي ليه مستهينه في نفسك؟ انت ما شاء الله عليكي و على وصفاتك الجميله و اللذيذه و كمان محترفه في اشغال النشر على المدونه...كل اللي عايزينه انك تطبخي و تنشري على المدونه و اذا حبيتي تحطي صور للوصفات او الخطوات بنكون سعداء جدا...ياللا احنامستنينك
    :)
    طبعا, من غي اي ضغوط عليكي...كله بيرجع لقرارك النهائي..بس بنحب انك تشاركينا

    ReplyDelete
  23. إممممممممممم

    طيب قوليلي يا سمورة هي المسايقة دي ليها وقت محدد ولا براحتي؟

    علشان أمخمخ بقى واصور وادلع الأكلة

    ولو إن برضه هبقى أي كلام

    ده انا استمتعت برؤيتك وانتي بتطبخي الفرخة الجزايري

    هو ده الشرح وإلا فلا

    لكن خلاص موافقة أحط صور

    عرفيني المسابقة هتخلص إمتى ويبقى شكرا جزيلا

    بحبك يا رافعة معنوياتي

    ReplyDelete
  24. دي مش مسابقه ابدا...هي مشاركه من الأعضاء لطبخ وصفه من كل بلد عربي كل شهر مره, يعني 12 مره في السنه بس...و الأختيار بيكون للعضو من البلد اللي الدور عليها...احنا عمالنا نمشي بألأحرف ألأبجديه....شهر مايو فات و دور الجزائر خلص. الدور في الشهر ده على البحرين, لكن احنا ما عندناش اعضاء من البحرين ,و بما انه انا ساكنه في البحرين ساعدت آرليت في ألأختيار, قررنا على الوصفات , اتنين اكل رز و لحم و سمك و شيء من هذا القبيل و وصفه للحلو..
    انتي لازم تبعتي ايميل لآرليت و هي حتعطيكي اذن بالدخول على بلوج النادي علشان تشوفي الوصفات و طريقة طبخها...الهدف هو المشاركه و التعريف بأكلات غير أكلنا اليومي العادي, منها نفيد و نستفيد يعني. طبعا احنا بنشجع انك تستعملي افكارك و ابتكاراتك و لمساتك الخاصه في تحضير الوصفات.
    شكرا على ألأستجابه.
    ايميل آرليت هو:
    phoeniciangourmet@sympatico.ca
    :)

    ReplyDelete