Thursday 21 May 2009

بطاطس برضه...لذيذة جدا صدقوني

طريقة البطاطس بتاعتي

زي ماوعدتكم هحط ليكم النهاردة طريقة تانية باستخدام البطاطس المسلوقة


1 - بتسلقوا كمية البطاطس اللي عايزينها


2 - بعد السلق تهرسوها كويس وفيه طريقة سهله للهرس وهي مش بالشوكه لكن تجيبوا كباية وتهرسوا البطاطس في إناء عميق بكعب الكباية دي


3 - بعد كده تقسموا البطاطس المهروسه دي واللي بقت شبه العجينة إلى أكتر من جزء


4 - نتبلوا البطاطس المهروسة بالملح والفلفل


5 - تخلطوا كل جزء بنوع من التوابل


جزء مع كمون ناعم

الجزء التاني مع نعناع جاف ناعم

الجزء التالت مع كسبرة ناشفة ناعمة

جزء رابع مع بهارات مفضلة عندكم

وهكذا لكم حرية الإختيار في المذاق الذي تفضلوه


6 - كل جزء تكونوا منه أشكال كور أو أصابع مبططة أو أصابع أسطوانية زي الكفتة


7 - فيه بقى طريقتين للتغطية قبل التحمير


أولا : نغطي الأشكال دي بالدقيق ونحمرها في زيت غزير ساخن


أو


ثانيا: نغمسها في البيض أولا ثم البقسماط الناعم ثم نحمرها في زيت غزير ساخن


8 - ينشلوا من الزيت ويتركوا حتى يجفوا


9 - يرصوا في طبق مغطى بالبقدونس


بالهنا والشفا

26 comments:

  1. دي بطاطس جوزي المفضلة بس مش انا اللي بعملها
    لأهو اللي بيعملها ويسيب المطبخ بعدها كآثار حرب عالمية تالتة بس فيه قصة مهمة
    لو البطاطس معمولة بالبيض والبقسماط وكانت الكمية كبيرة الزيت بعد مرتين ها يفور وها تبقى حوسة وعليه مع حالة تحمير وداخل بيض في القصة لازم تكون كمية مش كبيرة
    والا انت بتعملي حاجة في قصة فوران الزيت دي؟

    تسلم ايدك

    ReplyDelete
  2. يا أختي يا شملولة انا سبق وعملتها بالدقيق وفكت منى فى الزيت وبقت فتافيت
    أفتكر انها هتحتاج بيضة تتعجن معاها عشان تمسكها
    وتتعمل بالبيض والبقسماط
    وكما الاحسن بعد ما نعمل الصوابع او الاقراص نحطها فى الثلاجة نص ساعة قبل ما نحطها فى البيض والبقسماط وكده بتكون اسهل فى التعامل

    يا ريت تتقبلى تعليقى لانه بجد نتيجة لخبرتى المتواضعة فى المطبخ
    موووووووووووواه

    ReplyDelete
  3. مممممممممممممممممممممممم
    شهتيني في طبق من البطاطس و الله انا بموت في البطاطس دي حبيبتي الجماهير
    تسلمي يا قمر على التشكيلة الرهيبة ده

    ReplyDelete
  4. بصى البطاطس دى عشق العائلة كلها مش الاسرة بس
    عارفة فى حاجتين انا لازم اعملهم زى ما ستوتة قالت الزيت يكون سخن جدا و يغطى البطاطس بس ميكونش عالى اوى
    ويكون معمول ببيض مش دقيق بس عشان بتفك فى الزيت
    بس عجبتنى النكهات دى مجربتهاش قبل كدا
    الجميل انها طريقة سهلة
    :)
    شكرا ليك

    انا مشفتش ردك على التاج الريدير فظيع بجد
    اول مرة اشوفة بالحالة دى وملخبطنى خالص
    ممكن تعتبرية بطاطس وتعمليه تانى
    الريدير اكله قبل ما اشوفة باين كدا

    تقبلى مرورى

    ReplyDelete
  5. حلوة الطريقة وسهلة كمان:)
    تسلمى ياقمر

    ReplyDelete
  6. والله جوزك ده أستاذ ورئيس قسم البطاطس

    وهي فعلا لذيذة وتستاهل يعمل علشانها حرب عالمية تالته

    عمري ماتعرضت لموضوع فوران الزيت لأني بين كل خطوة والتانية بسيبها شوية كأنها بتنشف لكن لو حطيتيها وهي مش متماسكة ولينة هتفك في الزيت

    تحياتي

    جربيها بنفسك ومش هتندمي

    ReplyDelete
  7. يعني إيه ياريت أتقبل تعليقك يا دودو؟

    إنتي تقولي اللي انتي عايزاه وبعدين احنا هنا بنتبادل الخبرات

    حلوة حكاية نسيبها في التلاجة شوية عجبتني

    بس أنا عملتها بالدقيق ومش فكت علشان ماكانتس لينه كانت ماسكة نفسها وبعدين بسيبها بعد كل تغطية لفترة قبل تحميرها

    على العموم عندكم الطريقتين ووروني الشطارة بقى

    عايزاكي تعلقي دايما وتقترحي دايما أنا مش بتضايق من النقد ولا المداخلات نهاااااااااائي

    مواهين وحضن

    أحبك في الله

    ReplyDelete
  8. بصي بقى يا أحلى نكهة مغربية

    عايزاكي تجربيها زي ماجربتي محشي الكرنب بتاع صبرني يارب

    وقوليلي النتيجة

    بحبك قوي قوي

    ReplyDelete
  9. نونو حبيبتي

    أنا حاطه ليكم الطريقتين بالدقيق أو بالبيض والبقسماط

    وقلتلكم الزيت يكون غزير ومعناها يغطي البطاطس

    والسخونة معناها يتغلي الزيت قوي وبعدين لما تحطي أي حاجه بعد كده بتوطي النار

    دي طريقة تحمير أي حاجه

    الريدر وحش جدا لدرجة مش بيعرضلي كل المواضيع اللي بتتكتب مش عارفه مهيس كده ليه

    وفعلا أكل الرد بتاعي رغم إنه كان كبير

    مش هرد على التاجات دلوقتي علشان عايزة أرد عليها برواقة

    اعملي البطاطس وطمنيني هتطلع ازاي ويهمني رأي سومة قوي

    قبلاتي ليكي وليها

    ReplyDelete
  10. حبيبة قلبي الغالية قوي أمة الله الجميلة موناليزا

    ازيك يا حبيبتي وحشاني خالص

    ياريت البطاطس دي تعجبك وراعي الملاحظات اللي كتبناها أنا وباقي الطباخات المحترفات علشان التجربة تنفع

    عرفيني النتيجة

    أحبك في الله

    ReplyDelete
  11. سهلة وباين عليها لذيذة جداااا

    اول مرة اسمع بالطريقة دي :)

    تسلم ايدك ياخالتو

    ربنا يخليكي لينا

    ReplyDelete
  12. لا يا ماما بطاطس اييييييييههههههه
    أنا انشاء الله أجرب الكشريييي
    أنا حجزة أو تدكرة أهوووو
    الكشريييي الكشريييي الكشرييييي
    عاوزين الكشري
    بس يا حبيبتي أوعي تفكري و تقولي أنا حدوخها على الكشري زي معملت معايا على الكسكس و ليسه
    اوعييييي
    لا و الله أنا بكره انشاء الله حروح أتغدا مع ماما و أنا أكدت على الكسكس فخلاص مضمونة انشاءالله
    شدي حيلك انت بقى و حط الكشري بتاع مصر الاصلي ملي بيحطوه في الشارع ده عرفاه؟؟؟؟؟؟؟؟
    في عربيات يعني أنا بشوفهم في التلفزيون و بيكون عليه زحمة انما اييييييهههه

    بيشهي

    يلا أدينا ضمنا الكشري بعد المقدمة الطويلة دي و عقبال الطعمية.....

    ReplyDelete
  13. حبيبة خالتو نوارتي

    أنا سعيدة إن الصنف عجبك

    عايزاكي تنشريه بقى في الأوساط العائلية كلها لأنه فعلا سهل وشهي ومغذي

    بحبك قوي

    ReplyDelete
  14. ههههههههه

    أنا الحق عليا اللي شبطتك في الكشري

    أنا أعرف الناس تشبط في خروف مشوي ولا ديك رومي

    إنما إنتي عايزة كشري ةمن على العربية

    أعمل إيه دلوقتي ؟

    أجيبلك عربية كشري منين؟

    طيب بصي هحطلك الكشري السهل الأول علشان مش بياخد غلبة

    بس اصبري لما الناس تهضم البطاطس

    أنا كمان بحبك بزاف بزاف

    ReplyDelete
  15. حاضر يا قمورة اللي تحبي حطيه و مالو
    كل من اديك ديك و خروف ههه

    ReplyDelete
  16. تطلعاتك زادت قوي يا نكهة

    أجيبلك خروف مشوي منين دلوقتي ؟

    معزة تنفع؟

    ولا أقولك

    خلينا في الكشري أوفر هههههه

    ReplyDelete
  17. ايوه يا جميل انا باحب البطاطس دي اوي

    بس العيال ولادي الرخمين مش بيحبوها عايزين يتقعوا فى بطاطس مقليه شيبس

    تسلم اديكى يا قمر

    ReplyDelete
  18. ولا يهمك يا صبصب واعملي على قدك وماتحرميش نفسك من صنف بتحبيه

    بالنسبة للشيبسي إعمليه في البيت علشان الجاهز مش صحي

    أنا فضلت ورا ولادي لغاية لما بطلوا شرا الشيبسي ده

    وعلشان يقرمش بعد ماتقطعيه بالقطاعة بتاعة الشيبسي إغسليه لغاية لما الميه تبقى رايقة ومافيهوش نشا خالص

    بعد كده حطي عليه عصير لمون وملح

    هيطلع مقرمش وكمان نوع البطاطس بيفرق

    البطاطس الجديدة أفضل من المتخزنة

    منوراني بمرورك يا عسليه

    ReplyDelete
  19. يا حبوبتي انت فهمتيني غلط
    أنا كنت أقصد أقول: كلو من اديك بيطلع زي ديك و
    الخروف
    ده قصدي
    ههههههههههههههههههه
    ديما فهماني غلط دنا و الله غلباااااانةةة

    ReplyDelete
  20. ليه كده بس يا كوكو؟

    ده أنا كنت خلاص اشتريت الخروف

    يللا بقى ممكن أبيعه واشتري معزتين وابقى من كبار المستثمرين

    فين الكسكسي يا نصابة؟

    وماتقوليليش فين الكشري علشان قلتلك لما البطاطس تتهضم

    بوسيلي ياسمين

    ReplyDelete
  21. الكسكس وصل يا جميل انشاء الله بكرا تشفيه بالمدونة
    انشاء الله أشوفي على صفرتك من اديكي

    ReplyDelete
  22. هييييييييييييييييه

    هناكل كسكسي مغربي

    منتظرون يا قمر

    ReplyDelete
  23. يلا يا اختي خشي على الكسكسي علاشان تعرفي بس انحنا ولاد بلد
    ههههههههههههههه
    بالصحة و الراحة

    ReplyDelete
  24. السلام عليكم ورحمة الله تعالى اختي شملولة

    كيف احوالك ان شاء الله بخير. اشكر جزيل الشكر على زياراتك لموقعي ولتعاليقك التي تسعدني دائما ايضا بواسطة تعاليقك تعرفت على موقعك الرائع الدي اتمنى له من كل قلبي النجاح والاستمرار ان شاء الله

    بالنسبة لمواضيعي فهي مترجمة بلغتين فرنسي وفي نفس الوقت بالعربي الا بعض الاطباق التي لم اترجمها فانا ان شاء الله في طور الترجمة فلو شاهدتي طبق اعجبك فبامكانك ان تقولينه لي فانا اترجمه في الحين بادن الله تعالى

    نهارك سعيد وان شاء الله فرصة قادمة بادن الله تعالى

    ReplyDelete
  25. حبيبتي نكهة المغرب الجميلة

    يسلموا إيديكي على تلبية طلبي بمعرفة طريقة الكسكسي
    وأنا عارفه إنك تعبتي قوي علشان تجيبي الطريقة من الماما

    تسلمي إنتي وهي وبوسة وحضن مخصوصين لست الحبايب

    ReplyDelete
  26. بيت العز هلت عليه ريحة ياسمين مغربي يجنن

    أهلا ياسمينة

    شكرا لزوقك وزيارتك المعطرة

    وتسلمي إنك عايزة تترجمي بس لا يا حبيبتي لا تتعبي نفسك ولا تضيعي وقتك

    أنا هدور على المواضيع المترجمة وأكتفي بيها

    بحب نصايحك الدينية وتذكيرك لينا بمواضيع مفيدة جدا لحياتنا

    دمتي سالمة بحفظ الرحمن وأمانه

    ReplyDelete